ကျေးသီးမြို့နယ် ဝမ်ကျောင်းကျေးရွာခံ (၆)ဦးနဲ့ စွမ်းတောင်ကျေးရွာခံ (၃)ဦးကို မူးယစ်ဆေးဝါးနဲ့ ဆက်နွယ်သူတွေဆိုပြီး RCSS တပ်ဖွဲ့က ဖမ်းဆီး

  ကျေးသီးမြို့နယ် ဝမ်ကျောင်းကျေးရွာခံ (၆)ဦးနဲ့ စွမ်းတောင်ကျေးရွာခံ (၃)ဦးကို မူးယစ်ဆေးဝါးနဲ့ ဆက်နွယ်သူတွေဆိုပြီး RCSS တပ်ဖွဲ့က ဖမ်းဆီး

လွေးပိုးဆငယ်၊ ရွှေဖီမြေ

နိုဝင်ဘာ ၃ဝ ရက်၊ ကျေးသီး

ရှမ်းပြည်နယ်တောင်ပိုင်း ကျေးသီးမြို့နယ် ဝမ်ကျောင်းကျေးရွာခံ ၆ ဦးနဲ့ စွမ်းတောင်ကျေးရွာခံ ၃ ဦးတို့ကို နိုဝင်ဘာလ ၂၆ ရက် ညနေ ၆ နာရီမှာ သျှမ်းပြည်ပြန်လည်ထူထောင်ရေး ကောင်စီ (RCSS/SSA)တပ်ဖွဲ့က မူးယစ်ဆေးဝါးနဲ့ ဆက်နွယ်သူတွေဆိုပြီး ဖမ်းဆီးခေါ်ဆောင်သွားတယ်လို့ သိရပါတယ်။

ဝမ်ကျောင်းရွာခံ ၆ ဦးနဲ့ စွမ်းတောင်ကျေးရွာခံ ၃ ဦးတို့ဟာ ပြောင်းဖူးခြံမှာ ပြောင်းဖူးသွားချွေရင်း ဖမ်းဆီးခေါ်ဆောင်ခံရတာဖြစ်တယ်လို့ အမည်မဖော်လိုတဲ့ ကျေးရွာခံတစ်ဦးက ပြောပါတယ်။

“ဦးအိုက်ဗီး(ပြောင်းဖူးခြံပိုင်ရှင်)က ကျွန်တော်တို့ ရွာသားတွေကို ပြောင်းဖူးသွားချွေပေးဖို့အတွက် လာခေါ်တယ်။ ခြံမှာသွားအိပ်လည်း ဘာမှမဖြစ်ဘူးတဲ့။ သူက စားစရိတ် ကုန်ကျခံပေးမယ်တဲ့။ ကျွန်တော်တို့လည်း မိသားစု စားဝတ်နေရေး အခက်အခဲဖြစ်နေတာလေ”

ဖမ်းဆီးခေါ်ဆောင်းသွားခံရသူတွေကတော့ ဝမ်ကျောင်းရွာက ဦးကျန်ဆာ(၄၀ နှစ်)၊ ဦးမောင်ဦး(၃၀ နှစ်)၊ ဦးအိုက်ဦး(၂၅ နှစ်)၊ ဦးအိုက်ကျင်(၃၀ နှစ်)၊ ဦးအိုက်ကင်း(၃၀ နှစ်)နဲ့ မိုင်းအိုက်ညွှန့်(၂၅ နှစ်)တို့ပဲ ဖြစ်ပါတယ်။

စွမ်းတောင်ရွာခံ ၃ ဦးကတော့ ဝမ်းကျောင်းရွာခံတွေ မဟုတ်တဲ့အတွက်ကြောင့် နာမည်တွေ မသိရဘူးလို့ ၎င်းရွာခံက ပြောပါတယ်။

ရွာခံ ၆ ဦးရဲ့ မိသားစုဝင်တွေဟာ စားဝတ်နေရေး အခက်အခဲတွေ ကြုံတွေ့နေရပြီး မိသားစုအတွက် လုပ်ကျွေးပေးမယ့်သူလည်း မရှိတော့ဘူးလို့ ဖမ်းဆီးခံရတဲ့ ဦးအိုက်ဆာရဲ့ ဇနီးဖြစ်သူက ဆိုပါတယ်။

RCSS တပ်ဖွဲ့ ဖမ်းဆီးသွားတဲ့ ရွာသား ၆ ဦးရဲ့ မူလဇာတိဟာ ရှမ်းပြည်နယ်မြောက်ပိုင်း သီပေါမြို့နယ်ထဲမှာနေထိုင်သူတွေဖြစ်တယ်လို့လည်း သိရပါတယ်။

သီပေါမြို့နယ်မှာ လက်နက်ကိုင်ပဋိပက္ခတွေ စတင်ဖြစ်ပွားကတည်းက ရှမ်းပြည်နယ်တောင်ပိုင်း ကျေးသီးဘက်မှာ သွားရောက်နေထိုင်ကြတာ ဖြစ်ပါတယ်။

ဦးအိုက်ဆာရဲ့ ဇနီးဖြစ်သူက “သူတို့က ကျွန်မအမျိုးသားကို မူးယစ်ဆေးဝါးသုံးစွဲတယ်ဆိုပြီး ဖမ်းသွားတာတဲ့။ မနေ့ ကျွန်မတို့က ခြံပိုင်ရှင်ကို သွားမေးတဲ့အခါမှာ အခုကျွန်မအမျိုးသားက ဖမ်းသွားခံရပြီ။ ခြံပိုင်ရှင်အနေနဲ့ ဘယ်လို လုပ်ပေးမှာလဲပေါ့။ သူက ဒါတော့ ကျွန်တော်လည်း တာဝန်မယူရဲဘူးတဲ့။ ခင်ဗျားတို့ ရွာသား ၆ ဦးရဲ့ မိသားစုဝင်တွေကိုလည်း မကျွေးနိုင်ဘူးလို့ ပြန်ပြောတယ်” လို့ ပြောပါတယ်။

အခုလို ရွာသားတွေကို ဖမ်းဆီးခေါ်ဆောင်သွားတာနဲ့ပတ်သက်ပြီးတော့ RCSS ရဲ့ ပြောရေးဆိုခွင့်ရှိသူ ဒုတိယဗိုလ်မှူးကြီး စိုင်းအုမ်ခေးကို ဒီနေ့မွန်းလွဲပိုင်းမှာ ဖုန်းနဲ့ ၃ ကြိမ် ဆက်သွယ်ခဲ့ပေမဲ့ ဖုန်းလက်ခံ​ဖြေကြားခြင်း မရှိခဲ့ပါဘူး။

#ဖမ်းဆီးခံရ #ကျေးရွာဒေသခံ #ကျေးသီး

#ဓာတ်ပုံ- Local (ဖမ်းဆီးခံထားရတဲ့ ကျေးရွာဒေသခံများ)

https://www.facebook.com/451214215694715/posts/849538182528981/

https://www.facebook.com/shwepheemyaynews/posts/849538182528981