VOM သတင်းဌာန အယ်ဒီတာချုပ် နေမျိုးလင်းကို အကြမ်းဖက်မှုတိုက်ဖျက်ရေးဥပဒေဖြင့်အမှုဖွင့်

VOM သတင်းဌာန အယ်ဒီတာချုပ် နေမျိုးလင်းကို အကြမ်းဖက်မှုတိုက်ဖျက်ရေးဥပဒေဖြင့်အမှုဖွင့်
+++++++
Voice Of Myanmar- VOM သတင်းဌာန အယ်ဒီတာချုပ် ကိုနေမျိုးလင်းကို အကြမ်းဖက်မှုတိုက်ဖျက်ရေး ဥပဒေ ပုဒ်မ ၅၀ (က)၊ ၅၂ (က)တို့ဖြင့်အမှုဖွင့် ထားသည်။

VOM သတင်းဌာန အယ်ဒီတာချုပ် ကိုနေမျိုးလင်းကို မတ် ၃၀ ရက်နေ့ ည၉နာရီ ၃၀ မိနစ် ခန့်က ဖမ်းဆီး ခေါ်ဆောင်သွားခဲ့ပြီး မတ်လ ၃၁ ရက်နေ့တွင် ချမ်းမြသာစည် မြို့နယ် တရားရုံးတွင် အကြမ်းဖက် မှုတိုက်ဖျက်ရေး ဥပဒေပုဒ်များ ဖြင့် အမှုဖွင့်ကာ ရမာန်ယူရုံးထုတ်ခဲ့သည်။

ထိုသို့ရုံးထုတ်လာစဉ် ကိုနေမျိုးလင်း က “ ကျနော် ငြိမ်းချမ်းရေး အတွက် ရေးတာပါ။ ကျွန်တော် သတင်း မှာ ကျင့်ဝတ်နဲ့ အညီရေးထားပါတယ်။ ဒါတွေကိုလည်း မီဒီယာကောင်စီလူကြီးတွေ အနေနဲ့စစ်ပြီးတော့ ကျွန်တော်ကျင့်ဝတ်ချိုးဖောက်တယ်ဆိုရင် ကြိုက်တဲ့အပြစ်ဒဏ် ကျွန်တော်ခံနိုင်ပါတယ်” ဟု သတင်းမီဒီယာ များကို ပြောကြားခဲ့သည်။

Voice Of Myanmar- VOM သတင်းဌာန အနေနှင့် မတ်လ ၂၇ နေ့က တပ်မတော် နှင့် တိုက်ပွဲများ ဖြစ်ပွား နေသော AA အဖွဲ့၏ ပြောရေးဆိုခွင့်ရှိသူ ခိုင်သုခ နှင့် ဆက်သွယ်မေးမြန်းရေးသားဖော်ပြခဲ့ခြင်း ကြောင့် ထိုကဲ့သို့ တရားစွဲဆိုခဲ့ခြင်းဖြစ်သည်။

ယင်းသို့ တရားစွဲဆိုမှုသည် သတင်းမီဒီယာလွတ်လပ်ခွင့် အတွင် အနှောင့် အယှက်ဖြစ်ကြောင်း ကိုနေမျိုးလင်း ကထပ်လောင်း ပြောကြားသည်။

“ သတင်းလွတ်လပ်ခွင့် အတွက်အနှောင့် အယှက်ဖြစ်တာပေါ့ဗျာ ။ကျွန်တော် ငြိမ်းချမ်းရေး အတွက်ရည်ရွယ်ပြီး လုပ်တာပဲဆိုတော့လေ။ SB ကတရားစွဲထားတာဆိုတော့ရုံးတင်မှာပါ” ဟု ကိုနေမျိုးလင်းကပြောသည်။

ထိုကဲ့သို့ ဖမ်းဆီးတရားစွဲဆိုခြင်းနှင့် ပတ်သက်ပြီး နေ့စဉ်ထုတ်သတင်းစာများ နှင့် သတင်းမီယာများတွင် ဆောင်းပါများ ၊ အတွေးအမြင်များ ရေးသားနေသော သတင်းစာဆရာ ဂျေငြိမ်းက “သတင်းသမားတွေကို အရေးယူတဲ့အခါ သတင်းမီဒီယာကောင်စီကနေတစ်ဆင့် သွားဖို့ ဆိုပြီး ကောင်စီက မေတ္တာရပ်ခံချက် တွေပြုထားတယ်ဆိုတာကိုလည်း သိထားပါတယ်။ ဦးနေမျိုးလင်းကို အခုလို လုပ်တာဟာ သတင်းမီဒီယာ ကောင်စီရဲ မေတ္တာရပ်ခံချက်အပေါ် လျစ်လျူရှုတာဖြစ်သလို သတင်းသမားတွေအ တွက် သီးခြားပြဋ္ဌာန်း ထားပြီးဖြစ်တဲ့ သတင်းမီဒီယာဥပဒေကိုလည်း ဘောင်ကျော်လုပ် ဆောင်တာ၊ အလေးမထား တာလို့ပဲ မှတ်ချက်ပြုချင်ပါတယ်။” ဟု ဝေဖန်ထောက်ပြသည်။

ထို့အပြင် VOM သတင်းဌာန အယ်ဒီတာချုပ် ဦးနေမျိုးလင်းကို ဖမ်းဆီးတရားစွဲဆိုခြင်း ကိစ္စ သည် အစိုးရ နှင့် တပ်မတော်တို့ တွင်တွင် ပြောဆိုသုံးနှုန်းနေသည့် ဒီမိုကရေစီ စနစ်ကိုခုံမင်ကြောင်း ၊ ဒီမိုကရေစီစနစ် အတွက် ဆက်လက် လျောက်လှမ်းနေကြောင်း ပြောဆိုမှုများ ကိုလည်း ပြန်လည် မေးခွန်းထုတ်ရမည် ဖြစ်ကြောင်း ၎င်း ကဆိုသည်။

“ နိုင်ငံကို ဒီမိုကရစီလမ်းဆီတွန်းပို့ချင်တယ်၊ သွားချင်တယ်ဆို ဦးစွာလုပ်ရမယ့် အလုပ်က သတင်းမီဒီယာ တွေကို လွတ်လပ်ခွင့်ပေးဖို့ဆိုတာ ရှေ့တန်းကပါဝင်နေပါတယ်။ သတင်းမီဒီယာတွေကို လွတ်လပ်ခွင့်ပေး ဖို့ဆိုတဲ့အထဲမှာ လွတ်လပ်စွာသတင်းရယူခွင့်၊ လွတ်လပ်စွာထုတ်ဖော်ရေးသားခွင့်၊ ပုံနှိပ်ဖော်ပြ ခွင့်တွေက အဓိကဖြစ်ပါတယ်။ ဒါတွေအပေါ် ပိတ်ဆို့ဟန့်တားနေသမျှ ဒီမိုကရေစီဆိုတာ စကားလုံးတွေ အဖြစ်နဲ့သာ ကျန်ရှိနေဦးမှာပါလို့ပဲ မှတ်ချက်ပြုချင်ပါတယ်” သတင်းစာဆရာဂျေငြိမ်းက ပြောသည်။

ထိုသို့တရားစွဲဆိုထားခြင်း နှင့် ပတ်သက်ပြီး မြန်မာနိုင်ငံ သတင်းမီဒီယာ ကောင်စီကလည်း ကပ်ရောဂါဖြစ်ပွား နေချိန်တွင် သတင်းတု သတင်းမှားများကို တရားဝင်သတင်းဌာနများနှင့် ပူးပေါင်းတိုက်ဖျက်ရမည့်အစား ယခုကဲ့သို့လုပ်ဆောင်ခြင်းသည် မသင့်လျော်သကဲ့သို့၊ ဒီမိုကရေစီအသွင်ကူး ပြောင်း ကာလမျိုးနှင့် မဆီလျော်မအပ်စပ်သော တုန့်ပြန့် အဖြစ်ရှုမြင်ကြောင်း ထုတ်ပြန်ကြေညာထားသည်။

မြန်မာနိုင်ငံသတင်းမီဒီယာကောင်စီ အနေနှင့် ထိုကိစ္စနှင့်ပတ်သက်ပြီး တပ်မတော်သတင်းမှန်ပြန်ကြားရေးထံ ဆက်သွယ်ပြီး စုံစမ်းခဲ့ရာ ၎င်းကိစ္စသည် တပ်မတော်မှ လုပ်ဆောင်ခြင်းမဟုတ်ဘဲ ပြည်ထဲရေးဝန်ကြီးဌာနမှ တိုက်ရိုက် ကိုင်တွယ်ဆောင်ရွက်သည့်ကိစ္စဖြစ်ကြောင်း အကြောင်းပြန်ကြားထာသည်ဟု မြန်မာနိုင်ငံ သတင်းမီဒီယာ ကောင်စီ ၏ ထုတ်ပြန်ချက်တွင် ဖော်ပြပါရှိသည်။

https://www.facebook.com/khitthitnews/photos/a.390633294707356/885250251912322/?type=3&__xts__%5B0%5D=68.ARAfWn52MYrz1s2D8Z4rw_VSyORWcIvoUbSucY4jDtEzylwCCpPNT_o_itRT1h1HJlMTc2-ix_HK1z6IechKhTwYUFFtEHG9y5hNynIZpnz_X95WYS-Udtv0BrUWssZsE82FvHYYE4Hr48Ejtr226Crr7qbNlOoRIRuPQWEkQXR86aIHW5fqkUL5B1Psg6BquxcLPJzln8t8eZO6jTUT4q5GYEYFJm9F1FQCs_xxqrYcbN37k8snVqm0hg6_p9wjpHi9umS-nt1Nv4H3LL92DukSbV7o54xZlblgDQTiLELNRh-k_LuKdn_vYT6U-A5JwqbVQylL-REEfF8Wowo14Dg&__tn__=-R