မြောက်ဦးမြို့နယ်အတွင်း တိုက်ပွဲပြင်းထန် အရပ်သား ၄ ဦးသေ၊ ၁ ဦးပျောက်ဆုံး၊ နေအိမ်တွေမီးလောင်
AFP / GETTY IMAGES
ရခိုင်ပြည်နယ် မြောက်ပိုင်းဒေသ တိုက်ပွဲတွေပြင်းထန်နေတဲ့ မြောက်ဦးမြို့နယ် မြောက်ပိုင်း မြောင်းဘွေကျေးရွာ အနီးမှာရှိတဲ့ ရွှေလှံကျေးရွာနဲ့ မြောင်းဘွေချေ ကျေးရွာအကြားမှာ ဖေဖော်ဝါရီ ၂၉ ရက်နေ့ မနက်ပိုင်း ၇ နာရီ မိနစ် ၂၀ ဝန်းကျင်မှာ တပ်မတော်ယာဉ်တန်းကို ရက္ခိုင့်တပ်တော် အေအေဘက်ကနေပြီး တိုက်ခိုက်မှုပြုလုပ်ခဲ့တယ်လို့ ရက္ခိုင့်တပ်တော် အေအေက ဘီဘီစီကို အတည်ပြုပြောဆိုပါတယ်။
တိုက်ပွဲဖြစ်ပွားခဲ့တဲ့နေရာဟာ မြောက်ဦးမြို့နယ်နဲ့ မင်းပြားမြို့နယ်အစပ် ဟာရဘိုင်ကျေးရွာအနီး ရန်ုကုန်-စစ်တွေအဝေး ပြေးလမ်းပေါ်မှာ ဖြစ်ပွားခဲ့ တာဖြစ်ပြီး အဲ့ဒီကတိုက်ခိုက်ပစ်ခတ်မှုတွေဖြစ်ပွားခဲ့တဲ့အချိန်မှာ အနီးဝန်းကျင်မှာရှိတဲ့ ကျေးရွာတွေကို လက်နက်ကြီး လက်နက်ငယ်ကျည်တွေ ကျရောက်ခဲ့တာကြောင့် အရပ်သားသေဆုံးမှုတွေရှိခဲ့သလို နေအိမ်မီးလောင်မှုတွေလည်းရှိခဲ့တယ်လို့ မျက်မြင် သက်သေ ဒေသခံတွေကလည်း ပြောပါတယ်။
မိုင်းခွဲ တိုက်ခိုက်ခံခဲ့ရတဲ့ စစ်ယာဉ်တန်းမှာ ကား ၁၄ စီးပါပြီး မင်းပြားမြို့ကနေ မြောက်ဦးဘက်ကို ရန်ကုန်-စစ်တွေ ကားလမ်းအတိုင်း လာရာမှာ မြောင်းဘွေချေရွာနဲ့ ရွှေလံ ကားလမ်း တလျှောက်မှာ မိုင်းခွဲတိုက်ခိုက်ခံရပြီး စစ်ယာဉ်တန်းကို အေအေတပ်ဖွဲ့ဝင်တွေက နေရာအများအပြားကနေ ဖြတ်တောက်တိုက်ခိုက်ခဲ့တယ်လို့ ဒေသခံတွေက ပြောဆိုပါတယ်။
အဲ့ဒီတိုက်ပွဲအတွင်း ကျေးရွာအတွင်းကို လက်နက်ကြီးကျည်တွေကျရောက်ခဲ့တာကြာင့် မြောင်းဘွေတိုက်နယ်ကျေးရွာမှာ နေအိမ် ၃ လုံး မီးလောင်ကျွမ်းခဲ့ပြီး လက်နက်ကြီးအသံကြောင့် မြောင်းဘွေချေကျေးရွာက အမျိုးသမီးကြီးတစ်ဦး ဖြစ်တဲ့ ဒေါ်ဘားမဟာ နှလုံးရပ်ပြီး သေဆုံးသွားခဲ့တယ်လို့ မြောက်ဦးမြို့နယ် အမှတ် ၂ လွှတ်တော်ကိုယ်စားလှယ် ဦးဦးကျော်ဝင်းက ပြောပါတယ်။
ဒါ့အပြင် မြောင်းဘွေကျေးရွာနဲ့ ရွှေလှံကျေးရွာအကြားမှာရှိတဲ့ ဘူးတစ်လုံး မွတ်ဆလင်ကျေးရွာ၊ တန်းပျင်းကြီး၊ လေးမြို့စားကျေးရွာတွေမှာလည်း ဒေသခံ အနည်းဆုံး ၄ ဦး သေဆုံးခဲ့ပြီး ၁၀ ဦး ထက် မနည်းလည်း ထိခိုက်ဒဏ်ရာတွေရရှိခဲ့ကြတယ်လို့ ဒေသခံတွေကပြောပါတယ်။
- မင်းပြားမှာ ရေတပ်နဲ့ အေအေကြား တိုက်ပွဲကြောင့် အရပ်သားတစ်ဦးသေ၊ ငါးဦးဒဏ်ရာရ
- ရခိုင် အလယ်ပိုင်း မြေပုံမှာ တိုက်ပွဲဖြစ်၊ ရန်ကုန်-စစ်တွေ လမ်းအနီးမှာ တိုက်ပွဲ ပြင်းထန်
- ရခိုင် ပြည်နယ် မြို့တော် စစ်တွေ အနီးမှာ စစ်ယာဉ်တန်း မိုင်းဆွဲတိုက်ခိုက်ခံရတယ်လို့ တပ်မတော် အတည်ပြု
MYINT LWIN
"မနက် ၇ နာရီ ၂၀ မိနစ်မှာ မြောက်ဦးမြို့နယ်နဲ့ မင်းပြားမြို့နယ်အစပ် မြောင်းဘွေချေကျေးရွာနဲ့ ဟာရဘိုင်ရွာအကြားမှာ မြန်မာစစ်တပ်ရဲ့ စစ်ကား ၁၈ စီးပါတဲ့ စစ်ယာဉ်တန်းကို ကျွန်တော်တို့ ရက္ခိုင့်တပ်တော်ကနေပြီးတော့ ဖြတ်တောက်တိုက်ခိုက်ခဲ့တာရှိတယ်။ အဲ့ဒီမှာ မြန်မာစစ်တပ်ဘက်ကနေပြီးတော့ ထိခိုက်အကျဆုံးတွေရှိတယ်" လို့ အေအေရဲ့ပြောခွင့်ရသူ ခိုင်သုခက ပြောပါတယ်။
အဲ့ဒီတိုက်ပွဲအတွင်း တပ်မတော်ဘက်က အထိခိုက်ကျဆုံးတွေရှိခဲ့တယ်လို့ ရက္ခိုင့်တပ်တော်အေအေဘက်က ပြောဆိုပေမယ့် အတည်ပြုချက် တွေရရှိနိုင်ဖို့ တပ်မတော်ဘက်ကို ဆက်သွယ်ခဲ့ပေမယ့် အဆက်အသွယ်မရရှိခဲ့ပါဘူး။
တိုက်ပွဲအတွင်းမှာ နှစ်ဖက် ပစ်ခတ်တိုက်ခိုက်မှုတွေအတွင်း အနီးဝန်းကျင်က ကျည်တွေ ကျရောက်ခဲ့တဲ့အတွက် ဒေသခံ ရခိုင်လူမျိုးတွေနဲ့ မွတ်ဆလင်တွေ ထိခိုက်သေဆုံးမှုရှိခဲ့တယ်လို့ မြောက်ဦးမြို့နယ် အမှတ် ၂ လွှတ်တော်ကိုယ်စားလှယ် ဦးဦးကျော်ဝင်းက ပြောပါတယ်။
အရပ်သားတွေ ထိခိုက်သေဆုံးခဲ့ရာတာတွေဟာ တပ်မတော်စစ်ကြောင်း တိုက်ခိုက်ခံရပြီးနောက်ပိုင်းမှာ ကျေးရွာတွေဘက်ကို ပစ်ခတ်ခဲ့တဲ့အတွက် အရပ်သားတွေထိခိုက်ခဲ့ရတာဖြစ်ပါတယ်လို့ အေအေ ပြောခွင့်ရ ခိုင်သုခကပြောပါတယ်။
- လူကယ်ပြန်ဝန်ကြီးနဲ့ ရခိုင်ဝန်ကြီးချုပ်တို့ လိုက်ပါလာတဲ့ရဟတ်ယာဉ်ပစ်ခတ်ခံရမှု အေအေ ဘာပြောလဲ
- ပြည်တွင်းစစ်ကြားက မြန်မာငြိမ်းချမ်းရေးအချိုးအကွေ့
- ရခိုင်က မူလတန်းကလေးတွေ လက်နက်ကြီးထိတဲ့ကိစ္စ အရပ်ဖက်အဖွဲ့တွေ ကြေညာချက်ထုတ် ကန့်ကွက်
တိုက်ပွဲအတွင်း တန်းပျင်းကြီးရွာက ဦးသိန်းမောင်ချေ ၅၆ နှစ်နဲ့ ဇနီးဖြစ်သူ ဒေါ်စံသိန်း ၅၃ နှစ်တို့ဟာ ထမင်းစားနေစဉ် နေအိမ်ကို လက်နက်ကြီး ကျကွဲပြီး ပြင်းထန် ဒဏ်ရာတွေရရှိခဲ့တယ်လို့ ဒေသခံတွေက ပြောပါတယ်။ မြောင်းဘွေတံတားမှာ အလုပ်လုပ်နေတဲ့ ဆောက်လုပ်ရေးလုပ်သား တစ်ဦးလည်း သေနတ်ကျည် ၂ ချက် ထိမှန်ပြီး မင်းပြားဆေးရုံကို အရေးပေါ် ပို့ဆောင်လိုက်ရတယ်လို့ ဆိုပါတယ်။
မြောင်ဘွေကျေးရွာ အရှေ့ပိုင်းက ဆရာမ ဒေါ်သန်းသန်းအေးနေအိမ်၊ ဆရာဦးထွန်းသိန်းအိမ်နဲ့ ဦးကျော်သောင်းတို့ နေအိမ်တွေ ကိုလည်း လက်နက် ကြီးကျပြီး လုံး၀ ပြာကျအောင်ထိ မီးလောင်သွားခဲ့တယ်လို့ မျက်မြင် ဒေသခံတွေက ပြောပါတယ်။ လက်ရှိအချိန်မှာ တော့ မီးငြိမ်းသွားပြီလို့ ဆိုပါတယ်။
ဒါ့အပြင် မွတ်ဆလင်ကျေးရွာဖြစ်တဲ့ ဘူးတစ်လုံးရွာက ရွာအပြင်မှာ နွားကျောင်းနေသူတွေနဲ့ အလုပ်လုပ်ကိုင်နေသူ သုံးဦးဟာ လက်နက်ငယ် ကျည်ထိမှန်ပြီး သေဆုံးသွားခဲ့ကာ တစ်ဦးကတော့ ရှာမတွေ့သေးဘူးလို့ လိုက်ပါကူညီပေးနေသူ မွတ်ဆလင်ကျေးရွာသားတစ်ဦးက ပြောပါတယ်။
"နှစ်ဖက်ပစ်ခတ်တာမှာ ကျွန်တော်တို့ရွာက မွတ်ဆလင် ၃ ယောက်သေတယ်၊ ၁ ယောက်ကတော့ ပျောက်ဆုံးနေတယ်၊ ရွာပြင်မှာ နွားကျောင်းတယ်၊ လယ်ကွက်ကိုဆင်းကြတဲ့အချိန်မှာ ကျည်တွေက ရုတ်တရက်ကြီးကျလာတာ။ လက်နက်ငယ်ကျည်ထိတာပါ၊ ဒဏ်ရာရတာက အခုဆိုရင် ၆ ယောက်ရှိ နေပြီ"လို့ အဲ့ဒီ မွတ်ဆလင်ရွာသားက ပြောပါတယ်။
သေဆုံးသူတွေဟာ မာမောက်ဟာရက် (၁၈) နှစ် (ဘ) ဆီရူး၊ မာမောက်ရော်ဟိန်း (၁၂) နှစ် (ဘ) မာမောက်ဂျူးရူးနဲ့ အသက် ၃၅ နှစ်အရွယ် တစ်ဦးတို့ ဖြစ်တယ်လို့ ကျေးရွာလူကြီး တစ်ဦးကလည်း ပြောပါတယ်။
ဘူးတစ်လုံးကျေးရွာက သေဆုံးသူ ၃ ဦးနဲ့ ပျောက်ဆုံးနေသူ ၁ ဦးတို့မှာ အမျိုးသားတွေဖြစ်ကြပြီး ဒဏ်ရာရရှိသူတွေကတော့ အမျိုးသား ၃ ဦးနဲ့ အမျိုး သမီး ၃ ဦးဖြစ်တယ်လို့ ဒေသခံ မွတ်ဆလင် ရွာသား တစ်ဦးက ပြောပါတယ်။
အဲ့ဒီထဲက ဒဏ်ရာပြင်းထန်သူတွေကို ကိုယ့်နည်းကိုယ့်ဟန်နဲ့ မြောင်းဘွေတိုက်နယ်ဆေးရုံကို ပို့ဆောင်ထားတယ်လို့ ဆိုပါတယ်။
လောလောဆယ်မှာတော့ အဲ့ဒီအနီးဝန်းကျင်မှာ တိုက်ပွဲဖြစ်ပွားတာမရှိတော့ပေမယ့် ပစ်ခတ်သံတချို့ကိုကြားနေရပြီး အဝေးပြေးလမ်းမပေါ်နဲ့ လယ်ကွင်း တွေမှာ တပ်မတော်သားတွေ သွားလာလှုပ်ရှားနေတာကိုတွေ့နေရတဲ့အတွက် သေဆုံးသူတွေရဲ့အလောင်းတွေကိုတော့ လောလောဆယ် ဆေးရုံကို ပို့ဆောင်မပေးနိုင်သေးဘူးလို့ဆိုပါတယ်။
မြောက်ဦးမြို့နယ်အတွင်းမှာ တပ်မတော်နဲ့ အေအေတို့အကြား လွန်ခဲ့တဲ့ ၂၀၁၉ ခုနှစ်အတွင်းကနေ တိုက်ပွဲတွေ ပြင်းပြင်းထန်ထန်ဖြစ်ပွားခဲ့ကြပေမယ့် မြောက်ဦး နယ်ထဲမှာ ဆိုရင် တိုက်ပွဲတွေဟာ မြောက်ပိုင်းကနေ တောင်ပိုင်း အထိ ကျယ်ပြန့်လာနေအခု ၂၀၂၀ ခုနှစ်အတွင်းမှာ တောင်ပိုင်းဒေသကိုထိ ကျယ်ပြန့်လာခဲ့တာဖြစ်ပါတယ်။
တိုက်ပွဲဖြစ်ပွားတာတွေ ကျယ်ပြန့်လာနေတဲ့အတွက် ဆက်လက်ပြီးတော့ တိုက်ပွဲအခြေအနေတွေက ပြင်းထန်လာမယ့်အနေအထားတွေကို တွေ့နေရတယ်လို့ လွှတ်တော်ကိုယ်စားလှယ် ဦးဦးကျော်ဝင်းက ပြောပါတယ်။
ရခိုင် က ပြည်တွင်းစစ် အတွင်း တပ်မတော်နဲ့ အေအေတို့အကြား ပြီးခဲ့တဲ့ ၁ နှစ် ကျော် အတွင်း တိုက်ပွဲတွေ ပြင်းပြင်းထန်ထန် ဖြစ်ပွားနေကြပြီး တိုက်ပွဲတွေ ကြောင့် အရပ်သား ထိခိုက်သေဆုံးမှုဟာ ရာဂဏန်း အထက် ရှိလာနေပြီး နေရပ်စွန့်ခွာ ထွက်ပြေးရသူ အရေအတွက်ဟာလည်း သိန်းဂဏန်း အထိ ရှိလာနေပြီ ဖြစ်ပါတယ်။
No comments:
Post a Comment