ဒေါ်အောင်ဆန်းစုကြည် အပါအဝင် ထိန်းသိမ်းထားသည့် အစိုးရအဖွဲ့ တာဝန်ရှိသူများကို ပြန်လွှတ်ပေးရန် အမေရိကန်ပြည်ထောင်စုက တောင်းဆို
NEWS
Photo: AFP
Photo: AFP
PUBLISHED 1 FEBRUARY 2021 REF: CNA
နိုင်ငံတော်၏အတိုင်ပင်ခံပုရဂ္ဂိုလ် ဒေါ်အောင်ဆန်းစုကြည် အပါအဝင် ထိန်းသိမ်းထားသော အစိုးရအဖွဲ့ တာဝန်ရှိသူများကို ပြန်လွှတ်ပေးရန် အမေရိကန်ပြည်ထောင်စုက ဖေဖော်ဝါရီ ၁ ရက်တွင် တောင်းဆိုလိုက်ပြီး အာဏာသိမ်းခြင်း ဖြစ်ပုံရသည့်အပေါ် အမေရိကန်အစိုးရမှနေ၍ တုံ့ပြန်မှုတစ်ရပ် ပြုလုပ်ရန် သတိပေးလိုက်ကြောင်း သိရသည်။
နိုဝင်ဘာရွေးကောက်ပွဲများနှင့် ပတ်သက်၍ မသမာမှုဖြစ်ပေါ်ခဲ့ကြောင်း စွပ်စွဲမှုများနှင့် ပတ်သက်၍ တပ်မတော်နှင့် အရပ်သားအစိုးရအဖွဲ့တို့အကြား သီတင်းပတ်အတန်ကြာ တင်းမာမှုများ မြင့်တက်လာခဲ့ပြီးနောက် ဒေါ်အောင်ဆန်းစုကြည်နှင့် နိုင်ငံတော်သမ္မတ ဦးဝင်းမြင့်တို့ကို ထိန်းသိမ်းထားလိုက်ကြောင်း သိရသည်။
အမေရိကန်ပြည်ထောင်စုသည် မကြာသေးမီက ပြုလုပ်ခဲ့သည့် ရွေးကောက်ပွဲရလဒ်ကို ပြောင်းလဲရန်လည်းကောင်း၊ မြန်မာနိုင်ငံ၏ ဒီမိုကရေစီအသွင်ကူးပြောင်းရေးကို ပိတ်ဆို့တားဆီးခြင်းကိုလည်းကောင်း၊ ကြိုးပမ်းမှုမှန်သမျှအား ဆန့်ကျင်ပြီး ယင်းခြေလှမ်းများအား ပြန်လည်ပြောင်းလဲခြင်း မပြုခဲ့လျှင် သက်ဆိုင်ရာ တာဝန်ရှိသူများအား အရေးယူဆောင်ရွက်မှု ပြုလုပ်သွားမည်ဖြစ်ကြောင်း အိမ်ဖြူတော်ပြောရေးဆိုခွင့်ရ အမျိုးသမီး ယန်ဆာကီက ထုတ်ပြန်ချက်တစ်ရပ်၌ ပြောကြားထားသည်။
“ဒီမိုကရေစီစံနှုန်းများနှင့် တရားဥပဒေစိုးမိုးရေးတို့အား လိုက်နာရန်နှင့် ယနေ့ ထိန်းသိမ်းလိုက်သူများအား ပြန်လွှတ်ပေးရန် ကျွနု်ပ်တို့အနေဖြင့် တပ်မတော်နှင့် အခြားသက်ဆိုင်ရာ အားလုံးတို့အား တောင်းဆိုလိုက်သည်” ဟု ၎င်းက ပြောကြားထားသည်။
ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ် (NLD) ပါတီက အလွယ်တကူအနိုင်ရရှိခဲ့သည့် ရွေးကောက်ပွဲများ၌ မှုမမှန်မှုများ ဖြစ်ပေါ်ခဲ့သည်ဟူသော အခိုင်အမာပြောဆိုမှုများကို ဖြေရှင်းရန် အာဏာသိမ်းမှု ပြုလုပ်နိုင်ကြောင်း တပ်မတော်က လွန်ခဲ့သည့် သီတင်းပတ်ကတည်းက အရိပ်အမြွက် ပြသထားခဲ့သည်။
https://news-eleven.com/article/203693
No comments:
Post a Comment