နိုင်ငံရေး အခြေအနေအပေါ် ထင်မြင်ယူဆချက်များ မပေးရန် သံတမန်အသိုင်းအဝိုင်းအား တပ်မတော်သတိပေး

 ရွေးကောက်ပွဲ ရလဒ်အငြင်းပွားမှုကို အခြေခံပြီးနောက် ဖြစ်ပေါ်လာသည့် နိုင်ငံရေးအခြေအနေအပေါ်  ထင်မြင်ယူဆချက် သက်သက်ဖြင့် သဘောထားထုတ်ပြန်ချက်များမလုပ်ရန် သံတမန်အသိုင်းအဝိုင်းအား တပ်မတော်က ဇန်နဝါရီ ၃၁ ရက်တွင် ထုတ်ပြန်ချက်တစ်ခု ထုတ်ပြန်ကာ သတိပေးလိုက်သည်။

ဇန်နဝါရီ ၃၁ ရက် ညပိုင်းက ထုတ်ပြန်သည့် တပ်မတော်၏ အဆိုပါသဘောထားထုတ်ပြန်ချက်တွင် တကယ့် ဖြစ်ရပ်များကို  သိရှိနားလည်ခြင်းမရှိဘဲ ပုံမှန်လုပ်ဆောင်နေကျအတိုင်း နိုင်ငံရေးလုပ်ငန်းစဉ်များ၏ဖြစ်ပေါ်လာမည့် အဆင့်များကို နိုင်ငံတကာအသိုင်းအဝိုင်းအနေဖြင့် ထောက်ခံမှု မပြုသင့်ကြောင်း ဖော်ပြထားသည်။

ပြီးခဲ့သည့် ရက်ပိုင်းအတွင်း တပ်မတော် ကာကွယ်ရေးဦးစီးချုပ်က ၎င်း၏တပ်မတော်အရာရှိကြီးများကို မိန့်ခွန်းပြောရာ၌ အခြေခံဥပဒေကို လေးစားလိုက်နာမှုမရှိပါက ဖျက်သိမ်းပစ်ရမည် ဆိုသည့် ပြောကြားချက်ပေါ် အခြေခံလျက် မြန်မာနိုင်ငံတွင် တပ်မတော်အာဏာသိမ်းမှု ပြန်ဖြစ်လာမည်ကို နိုင်ငံတကာအသိုင်းအဝိုင်းနှင့် နိုင်ငံရေးလေ့လာသုံးသပ်သူများက စိုးရိမ်ခဲ့သည်။

ယင်းနောက်  ဥရောပသမဂ္ဂအပါအဝင် နိုင်ငံတကာသံရုံး ၁၈ ခုက တပ်မတော်နှင့် နိုင်ငံအတွင်းရှိအခြားသော လူပုဂ္ဂိုလ် အဖွဲ့အစည်းအားလုံးအနေဖြင့် ဒီမိုကရေစီစံနှုန်းများကို လိုက်နာစောင့်ထိန်းကြပါရန် တိုက်တွန်းကြောင်း၊ ရွေးကောက်ပွဲရလဒ်ကို ပြောင်းလဲရန် သို့မဟုတ် မြန်မာ့ဒီမိုကရက်တစ် အသွင်ကူးပြောင်းမှုကို ကြန့်ကြာစေရန်အလို့ငှာ မည်သို့သောကြိုးပမ်းအားထုတ်မှုမျိုးကိုမဆို မိမိတို့ ဆန့်ကျင်ကန့်ကွက်ကြောင်း၊ မြန်မာနိုင်ငံသားများအတွက် ပိုမိုကောင်းမွန်သော ဒီမိုကရက်တစ်လွတ်လပ်မှု၊ အဓွန့်ရှည်တည်တံ့သောငြိမ်းချမ်းမှု နှင့် အားလုံးပါဝင်သော သာယာဝပြောမှုအတွက်ရှေ့ရှုလုပ်ဆောင်နေကြသူအားလုံးကို ထောက်ခံကြောင်း ဇန်နဝါရီ ၂၉ ရက်တွင် ကြေညာချက်များ ထုတ်ပြန်ခဲ့သည်။

ယင်းသို့ မြန်မာ့ဒီမိုကရေစီအပြောင်းအလဲကို နှောင့်နှေးကြန့်ကြာစေသည်ဆိုသော သံတမန်အသိုင်းအဝိုင်း၏ပြောကြားချက်ကို ငြင်းဆိုကြောင်း တပ်မတော်၏ ဇန်နဝါရီ ၃၁ ရက် ညပိုင်းသဘောထားထုတ်ပြန်ချက်က ဆိုသည်။ တပ်မတော်သည် တည်ငြိမ်အေးချမ်းစွာပြုပြင်ပြောင်းလဲရေး နှင့် အဆင့်ဆင့် ဒီမိုကရေစီအသွင်ကူးပြောင်းရေးအတွက် လမ်းပြမြေပုံဖြစ်သည့် ၂၀၀၈ ခုနှစ်ဖွဲ့စည်းပုံအခြေခံဥပဒေကို ရေးဆွဲခဲ့ပြီး ဒီမိုကရေစီအသွင်ကူးပြောင်းရေးကို လမ်းခင်းပေးခဲ့သူဖြစ်သည်ဟု သဘောထားထုတ်ပြန်ချက်တွင် ဖော်ပြခဲ့သည်။

ပြည်ထောင်စု ရွေးကောက်ပွဲကော်မရှင်နှင့် NLD အစိုးရအား တပ်မတော်အနေဖြင့် ကန့်ကွက်နေရခြင်းမှာ ရွေးကောက်ပွဲရလဒ်တစ်ခုတည်းအတွက် မဟုတ်ကြောင်း၊ တပ်မတော်အနေဖြင့် မဲမသမာမှုဖြစ်စေနိုင်သော မဲ ၁၀ ဒသမ ၅ သန်းခန့်အတွက် ၂၀၂၀ ရွေးကောက်ပွဲလုပ်ငန်းစဉ်ကို လက်ခံနိုင်ဖွယ်မရှိဟု တွေ့ရှိခဲ့ကြောင်း ထုတ်ပြန်ချက်က ဆိုသည်။ ယင်းသို့ကြီးမားသော အမှားအယွင်းမျိုးကို သံတမန်အသိုင်းအဝိုင်းအနေဖြင့်ရော လက်ခံနိုင်မည်လားဟု တုန့်ပြန်ခဲ့သည်။

တပ်မတော်အနေဖြင့် ရေရှည်တည်တံ့သည့် ငြိမ်းချမ်းရေး ၊ ပြည်သူအားလုံးသာယာဝပြောရေးတို့အတွက် ဖွဲ့စည်းပုံအခြေခံဥပဒေက ချမှတ်ထားသည့် လွတ်လပ်၍တရားမျှတသော ရွေးကောက်ပွဲဆိုင်ရာ ဒီမိုကရေစီစံနှုန်းများကိုလိုက်နာနိုင်ရေး ဖြစ်နိုင်သမျှ လုပ်ဆောင်သွားမည်ဟု ဆိုသည်။

https://myanmar.mmtimes.com/news/150743.html