SSPP ထိန်းချုပ်ဒေသတွင် နိုင်ငံခြားပြန် ၁၀၀ ခန့် ရှိသဖြင့် ဗိုင်းရပ်စ် ပါလာမည်ကို စိုးရိမ်နေ

SSPP ထိန်းချုပ်ဒေသတွင် နိုင်ငံခြားပြန် ၁၀၀ ခန့် ရှိသဖြင့် ဗိုင်းရပ်စ် ပါလာမည်ကို စိုးရိမ်နေ
SSPP တပ်ဖွဲ့ဝင်တဦး ပိုးသတ်ဆေးဖြန်းနေစဉ် / SSPP Info
10.1k
By ဇင်လင်းထက် 31 March 2020
Want create site? Find Free WordPress Themes and plugins.
ရှမ်းပြည် တိုးတက်ရေး ပါတီ (SSPP/SSA) ထိန်းချုပ်ဒေသတွင် ထိုင်းနိုင်ငံနှင့် တရုတ်နိုင်ငံတို့မှ ပြန်လာသည့် ရွှေ့ ပြောင်း လုပ်သား ၁၀၀ ဝန်းကျင်ရှိသဖြင့် ကိုရိုနာဗိုင်းရပ်စ် (Covid-19) ပါလာပြီး ပြန့်ပွားမှုဖြစ်မည်ကို စိုးရိမ်ကြောင်း SSPP/SSA ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်က ဧရာဝတီသို့ ပြောသည်။

“ယိုးဒယားကနေ ပြန်လာတဲ့သူက တော်တော်များတယ်လေ။ စိုးရိမ်တာပေါ့။ စိုးရိမ်တော့ ဒီရောဂါကို ဆက်ပြီး မပြန့်ပွား အောင်လုပ်ဖို့ ကျနော်တို့ ဘယ်လိုထိန်းချုပ်မလဲဆိုတာတွေ လုပ်ဆောင်နေပါတယ်”ဟု ၎င်းက ပြောဆိုသည်။

SSPP ထိန်းချုပ်ဒေသတွင် Covid-19 ထိန်းချုပ်ရေး ကော်မတီကို ဖွဲ့စည်းထားပြီး ထိုကော်မတီက လူထုကို ဗိုင်းရပ်စ် ကာကွယ်ရေးအတွက် မည်ကဲ့သို့ ပြုမူနေထိုင်ရမည် ဆိုသည်ကို အသိပေးထားကြောင်း ဗိုလ်မှူး စိုင်းဖုန်းဟန်က ဆက် ပြော သည်။

မြန်မာနိုင်ငံ ကျန်းမာရေးနှင့် အားကစားဝန်ကြီးဌာန၊ ကမ္ဘာ့ကျန်းမာရေးအဖွဲ့ (WHO) တို့က ကြေညာထားသည့် ဗိုင်းရပ်စ် ကာကွယ်ရေး နည်းလမ်းများကို လူထုထံ အသိပေးကြေညာထားခြင်း ဖြစ်ကြောင်း ၎င်းက ဆိုသည်။

“သီးသန့် ဘယ်လိုနေနိုင်မလဲ ဆိုတာကို စိစစ်ပြီး လမ်းညွှန်တယ်လေ။ လူစုလူဝေးတွေ မလုပ်ဖို့လည်း ကျနော်တို့ ကြေညာထားတာ ရှိတယ်”ဟု ဗိုလ်မှူး စိုင်းဖုန်းဟန်က ပြောပြသည်။

SSPP ထိန်းချုပ်ဒေသရှိ ဒေသခံများ မိမိနေရပ်သို့ ပြန်လာသည်ကို ကန့်သတ်ထားခြင်း မရှိသေးဘဲ ပြန်လာသူများကို ကိုယ်အပူချိန်တိုင်းခြင်းများ ဆောင်ရွက်ပေးနေကြောင်း၊ ဒေသခံမဟုတ်သူများကို ညအိပ်ခွင့် မပြုထားကြောင်း ၎င်းက ပြောဆိုသည်။

ဗိုလ်မှူး စိုင်းဖုန်းဟန်က“တရုတ်ပြည်က ပြန်လာတဲ့သူတွေလည်း ရှိပါတယ်။ ထောင်ချီတော့မရှိပါဘူး။ တနယ်လုံး ရာ ဂဏန်းလောက်ပဲ ရှိပါတယ်။ ကျနော်တို့ ဌာနချုပ်အနီးဆိုရင် ဆယ်ဂဏန်းလောက်တော့ ရှိပါတယ်”ဟု ပြောသည်။

နေရပ်ပြန်လာသူများကို မိမိအိမ်တွင်သာ လူအများနှင့် ခပ်ခွာခွာနေရန် SSPP က ညွှန်ကြားထားသည်။

မတ်လ ၃၀ ရက်အထိ SSPP ထိန်းချုပ်ဒေသတွင် ဗိုင်းရပ်စ် ကူးစက်ခံရသည့် သံသယလူနာ မရှိသေးကြောင်း၊ သို့သော် ဗိုင်းရပ်စ် ကာကွယ်ရေးအတွက် အစိုးရနှင့် ချိတ်ဆက် ဆောင်ရွက်ထားမှု မရှိသေးကြောင်း SSPP ထံမှ သိရသည်။

SSPP အဖွဲ့သည် ရှမ်းပြည်နယ် မြောက်ပိုင်းရှိ တန့်ယန်း၊ သီပေါ၊ လားရှိုး၊ မိုးမိတ်၊ ကျောက်မဲ၊ သိန္နီ၊ မူဆယ်၊ နမ့်ခမ်း မြို့အထိ သွားလာလှုပ်ရှားကာ အဆိုပါမြို့ဝန်းကျင်ရှိ ရွာတချို့ကို ထိန်းချုပ်ထားကြောင်း ဆိုသည်။

ပြည်သူ့လွှတ်တော် ကိုယ်စားလှယ်ဟောင်းလည်းဖြစ်၊ နိုင်ငံရေး လေ့လာသူလည်းဖြစ်သည့် ဦးရဲထွန်းက “သူတို့ရှိတဲ့ ဒေသကို လားရှိုးတို့ တန့်ယန်းတို့ အဲဒီဒေသကို ပြန်ဖြတ်ပြီးတော့မှ ရောက်မှာလေ။ ဆိုတော့ သူတို့ဆီမှာ အဲဒီလောက်အထိ လုပ်ထားနိုင်ရင် လုံလောက်တယ်လို့ မြင်တယ်။ သူတို့က နယ်စပ်မဟုတ်ဘူး။ နယ်စပ်ဆိုရင် ဒီထက် မက လုပ်သင့်တာပေါ့”ဟု ဆိုသည်။

SSPP သည် ၁၉၈၉ ခုနှစ်တွင် တပ်မတော် အစိုးရနှင့် အပစ်အခတ် ရပ်စဲရေး စာချုပ်ကို လက်မှတ်ထိုးခဲ့သော်လည်း တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ် (NCA) တွင် လက်မှတ်ရေးထိုးခြင်း မရှိသေးပေ။

https://burma.irrawaddy.com/news/2020/03/31/219557.html