AA ကို ဆက်သွယ်သတင်းဖော်ပြသည့် သတင်းသမားများကို ပြည်ထဲရေးက တရားစွဲဆို၊ မဏ္ဍိုင် ၄ ရပ် တွေ့ဆုံပွဲ တွင် အဖြေရှာရန် လိုအပ်နေဟု ဦးဇော်ဌေးပြော

AA ကို ဆက်သွယ်သတင်းဖော်ပြသည့် သတင်းသမားများကို ပြည်ထဲရေးက တရားစွဲဆို၊ မဏ္ဍိုင် ၄ ရပ် တွေ့ဆုံပွဲ တွင် အဖြေရှာရန် လိုအပ်နေဟု ဦးဇော်ဌေးပြော

ရန်ကုန်၊ မေ ၁

ရခိုင်တပ်တော် AA ကိုဆက်သွယ်သတင်းဖော်ပြသည့် သတင်းသမားများကို ပြည်ထဲရေးဝန်ကြီးဌာနက တရားစွဲဆိုခြင်းဖြစ်ပြီး သတင်းရယူခွင့်နှင့်ပတ်သက်၍ အကြမ်းဖက်ဥပဒေကို သတင်းထောက်များကို သတိထားရမည်ဖြစ်ကာ မဏ္ဍိုင် ၄ ရပ်တွေ့ဆုံပွဲတွင် အဖြေရှာရန် လိုအပ်နေကြောင်း နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက ပြောဆိုသည်။

ယနေ့ နေပြည်တော်တွင် ပြုလုပ်သော သတင်းမီဒီယာများနှင့် အွန်လိုင်းဆက်သွယ် ချိတ်ဆက် ရှင်းလင်းပွဲတွင် ၎င်းက အထက်ပါအတိုင်းပြောဆိုလိုက်ခြင်းဖြစ်သည်။

"AA ကို အကြမ်းဖက်အုပ်စုအဖြစ် အစိုးရက ကြေညာတာဖြစ်ပါတယ်။ ကြေညာလိုက်တဲ့အတွက် ဒီကြေညာချက်အရ အကြမ်းဖက်ဥပဒေမှာပါတဲ့ အချက်တွေကို သတင်းထောက်တွေအနေနဲ့ သတိထားဖို့လိုပါတယ်။ ပြည်ထဲရေးကနေပြီးတော့ တရားစွဲတယ်။ တချို့ဟာတွေလည်း သူတို့ ဘယ်လို တရားစွဲတယ်ဆိုပြီးတော့ တင်ပြပါတယ်။ တင်ပြတော့ မီဒီယာတွေနဲ့ပတ်သက်လို့ ကျနော်တို့လည်း တချို့ဟာတွေ ရှင်းပြတယ်။ ဥပမာ- Press Council ရဲ့ Role က ဘာလဲပေါ့။ အဲဒီမှာ အကြမ်းဖက်တိုက်ဖျက်ရေးဥပဒေမှာ ဘာပါလဲဆိုတော့ လူမျိုးရေး၊ ဘာသာရေးပေါ့ အဲဒီလို ကိစ္စတွေနဲ့ပတ်သက်ပြီးတော့ ဒါကတော့ မီဒီယာဥပဒေမှာပါတယ်။ အဲဒီဥပဒေနဲ့ပဲ တရားစွဲရမယ်။ Press Council Role က အဲဒီအထဲမှာ မပါဘူး။ တစ်ခါတည်းစွဲဆိုနိုင်တယ်ဆိုတဲ့ အချက်ပါနေတယ်။ ဥပဒေကြောင်းအရ ဟိုဘက် ဒီဘက် အပြန်အလှန် အစိုးရပိုင်း၊ မီဒီယာပိုင်း၊ Press Council ပိုင်း။ အထူးသဖြင့်တော့ သတင်းရယူခွင့်ပေါ့။ သတင်းရယူခွင့်အပိုင်းမှာ ဒီလို အကြမ်းဖက် အဖွဲ့အစည်းနဲ့ ဆက်သွယ်တဲ့ဟာတွေက နည်းနည်းလေး Complicated ဖြစ်လာတယ်။ ဥပဒေအရ ငြိစွန်းနေတယ်။ ငြိစွန်းပေမယ့် သတင်းမီဒီယာကတော့ သတင်းရယူခွင့်အတွက် ဆက်သွယ်ပြောဆိုရတာတွေ ရှိတယ်။ ကိုဗစ် နည်းနည်းလေး ငြိမ်သွားတဲ့အချိန်ကျရင်တော့ မဏ္ဍိုင် ၄ ရပ် တွေ့ဆုံဆွေးနွေးပွဲတွေမှာ အဖြေရှာဖို့လိုတယ်။ လောလောဆယ်တော့ ဥပဒေပိုင်းအရ ငြိစွန်းနေတာတွေကို ဥပဒေအရ လုပ်ပါလို့ ပြောထားတယ်" ဟု ဦးဇော်ဌေးက ဆိုသည်။

ပြည်ထဲရေးဝန်ကြီးဌာနက VOM အယ်ဒီတာချုပ် ဦးနေမျိုးလင်း၊ ခေတ်သစ်အယ်ဒီတာချုပ် ဦးသာလွန်ဇောင်းထက်၊ Narinjara အယ်ဒီတာချုပ် ဦးခိုင်မြတ်ကျော်နှင့် RFA သတင်းထောက်တို့ကို အကြမ်းဖက် တိုက်ဖျက်ရေးဥပဒေနှင့် အမှုဖွင့်ခဲ့ပြီး ဦးနေမျိုးလင်းမှာ ဥပဒေရုံးက အမှုမမြောက်သဖြင့် ဖမ်းဆီး အချုပ်ခံရပြီးမှ ပြန်လည်လွတ်မြောက်ခဲ့သည်။ ကျန်ရှိနေသော သတင်းသမား ၃ ဦးမှာမူ အမှုဖွင့်ခံထားရဆဲဖြစ်သည်။

သတင်းသမားများကို အကြမ်းဖက်ဥပဒေဖြင့် အမှုဖွင့်ခြင်းကို မြန်မာနိုင်ငံသတင်းမီဒီယာကောင်စီ၊ ပြည်တွင်းသတင်းသမားအဖွဲ့အစည်းများက ကန့်ကွက်ထားကြပြီး မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး ကိုယ်စားလှယ်၊ အမေရိကန်အခြေစိုက် သတင်းသမားများကာကွယ်ရေးကော်မတီ CPJ ၊ အပြည်ပြည်ဆိုင်ရာ လွတ်ငြိမ်းချမ်းသာခွင့် အဖွဲ့ AI အပါအဝင် ပြည်တွင်းပြည်ပ အသိုင်းအဝိုင်းက ကန့်ကွက်လျက်ရှိသည်။

https://www.facebook.com/khitthitnews/posts/907314959705851?__cft__[0]=AZUtRglIjk6T1_bLO80Uuku6cNcMPBePZqhXlhyi_0mjpxtC2MmxcOoswO5QuGq4wQHDRsBem9-xJTUyuQfKYmQFsyVKNvlDxdgo3X7KzGMeXMWr-fzDJr6KTi5J0QzFhdodIwN5byAOi7Kd8qmdpduktliLWGse_OhzCjScQCU-3w&__tn__=%2CO%2CP-R